لو سألت أغلب اللي بيتكلموا اللغة العربية عن الهندوسية (كديانة!)، هتلاقي المعلومات لا تتخطَى كونهم ”بيعبدوا“ البقر! وده تصوُّر مغلوط، وفهم قاصر جدًا للهندوسية. الأسوأ إن ده كل التصور المعرفي عنهم في العقلية العربية، مضاف له تعدد الآلهة اللي هو بدوره تصوُّر مغلوط. حابب في مجموعة مقالات، أوضح الإيمانيات الهندوسية في محاولة نشر وعى أكبر، بدل من التصورات الطفولية الخاطئة المنتشرة جدًا عند كتير مقروش أى كتب من/عن الهندوسية.
الهندوسية تعتبر من أقدم -إن مكانتش أقدم- المعتقدات اللي مازلت حيّة اللي اتوجدت في تاريخ البشرية (ده طبعًا لو تغاضينا عن الإدعاء العبراني غير السليم وغير الدقيق إن الديانة اليهودية ابتدت بوجود أول إنسان على الأرض، بافتراض وجود ”إنسان أول“). بعض الأبحاث الآركيولوجية (مُختَلَف عليها) بتعتبرها موجودة -بشكل بدائي- من قبل عام ٨٠٠٠ ق.م. (من حوالي ١٠ آلاف سنة)، في للعصر الحجري المتوسط (راجع الأبحاث اللي اتعملت على "ملاجئ بيمبتكا الصخرية“)، ده برغم إن المصطلح نفسه ”هندوسية“ مكنش موجود بلفظه في بدايات الهندوسية.
كمان فيه سوء فهم عن الهندوسية إنها ”منظومة اعتقادية واحدة“، وده مش سليم، هى مجموعة (set) من النظم العقيدية والممارسات المتعددة اللي بتجمعها سمات مشتركة وهى اللي ناوي أوضحها في سلسلة من المقالات (لو مفقدتش الشغف في توضيحها!) هتغاضَى من هنا ورايح عن عدم دقة تلقيبها بـ ”ديانة“ رغم كونها بوتقة/مظلة لعدة معتقدات، تبسيطًا مش أكتر.
من المعتقدات المشتركة للديانات الهندوسية على سبيل المثال، وجود الـ atman اللي ممكن تتصورها بخلفيتك الاسلا-مسيحية بكونها الروح/النفس، ووجود الـ samsara اللي هى حركة ولادة واعادة ولادة الـ atman بايلادات متعددة متفارقة زمنيًا، واللي بتنتهي بحالة الـ moksha، حالة الخلاص من دائرة الـ samsara، اللي بيتطَّلَب بلوغها خوض الـ dharma، الـ dharma هى الحياة التقوية بمفهومك الاسلا-مسيحي، الحياة اللي منطبقة على القانون الطبيعي اللي مجبولة عليه الـ atman (لو أنت مسلم، ممكن تقربها للـ”فطرة“).
ازاى تخلص وتوصل للـ moksha في الهندوسية؟ فيه تلات طرق بيتسموا الـ marga:
١. الـ jnana-marga تقابل البصيرة المعرفية في الاصطلاح الاسلا-مسيحي، محورها التدبر/التفكُّر والتأمل
٢. الـ karma-marga تقابل الاستقامة الفعلية في الاصطلاح الاسلا-مسيحي، محورها الأعمال السلامية الخيرية بحسب الـ code الأخلاقي
٣. الـ bhakti-marga تقابل التكريس/الاعتكاف في الاصطلاح الاسلا-مسيحي، ومحورها العبادات والطقوس والصلوات
كل واحدة من التلاتة دول ليها طقوسها وممارساتها الهندوسية الخاصة اللي بتناسب الثقافة والوسط والخلفية اللي نشأت فيه في زمكانها، على سبيل المثال مش الحصر: اليوغا، والتأمل، والـ puja (شبه الصلاة في الاسلا-مسيحية)
في الهندوسية، بتؤمن كل التفريعات العقيدية (المذاهب/الطوائف) بوجود إله خالق، Brahma، وبيضموه في ثالوث إيماني موحَّد/واحد من ٣ شخوص (زىّ المسيحية مع فارق التوصيف)، بمُسمَّى الـ Trimurti، بدءا من Brahma الخالق، مع Vishnu (الحافظ)، و Shiva (المدمر)، ممكن برضوه تتخيلهم بالتصور الألوهي-الأقانيمي المسيحي مع وجود اختلافات كتيرة بين التصورين، بس ده أكبر تقريب لمسلماتك وخلفيتك الدينية.
مع الوقت تم إضافة عديد من التصورات الألوهية للـ Trimurti الألوهي، بحسب التقاليد المختلفة في أزمكنتها المختلفة، وكل جماعة ابتدت تضيف آلهتها المحلية للثالوث ده، بدون نزع أو تنازل عن وحدوية الجوهر الإلهي (ده برضوه مصطلح مسيحي انا مجبر استخدمه للشرح)، وعشان يميزوا الثالوث الأولى عن المضاف لاحقًا، اعتبروا الثالوث الأولّي Major god(s) والباقي minors. وآمنوا إن الـ minors هم تجليات قوَى/طاقات مختلفة لجوهر الـ Trimurti، وظل إيمانهم بـ ”إله واحد“ متعدد الشخوص/الأقانيم ومتعدد الطاقات/التجليات (لو أنت قارىء من خلفية مسيحية، هيكون الكلام ده مستساغ لك جدًا، ومش متعارض بشكل كبير مع وحدانية الألوهة).
في آخر فقرة في المقال ده، هشرح باختصار النصوص المقدسة في الهندوسية، أهمها الـ Vedas الـ ٤، ديه نصوص بترجع للفترة الزمنية من ١٢٠٠ لـ ٩٠٠ ق.م. وتعتبر أمهات الكتب المقدسة عندهم... وشبه التراث السلفي/الآبائي فيه تفاسير للـ Vedas اسمها الـ Brahmanas ، وديه بتاخد في بعض التقاليد مكانة مقدسة (تقابل تقديس الأرثو-كاثوليكية المسيحية لكتابات الآباء، أو مكانة المذاهب الفقهية الأربعة عند أهل السنة)، ونصوص تانية متفرقة بعضها يشبه نصوص المجامع المسكونية المسيحية اسمها الـ Upanishads وديه نصوص بتهتم بالاقرارات العقيدية النظرية، ونصوص متوارثة بعضها ملحن (تقابل الليتورجية المسيحية والألحان، والأناشيد الصوفية الإسلامية) زىّ الـ Mahabharata والـ Ramayana، وفيها قصص لا تقل عدم-دقة-تاريخية وأسطورية عن السنكسار القبطي على سبيل المثال أو الروايات الإسرائيلية (الإسرائيليات) الجدلية في أمهات الكتب الإسلامية.
في المقال ده أخدتك في جولة سريعة مختصرة، كجولة تعريفية مش أكتر، والتفصيل هيبقى يجي بعدين في بقية المقالات اللي تقدر تتباعها لو مهتم تعرف اكتر عن الهندوسية بشكل سليم غير مؤدلَج ولا مُشَيطِن.
ملحوظة: أنا مبدعيش المعرفة الكليّة أو اليقينية للمعتقدات الهندوسية، طبعًا هيكون ادعاء ساذج مع تراث ضخم ودسم متُرجِمش بالكامل للغات سامية ورومانسية وجرمانية من اللي بتقنهم؛ فلو حابب تصحح أو تنقح أى معلومة نشرتها أو هنشرها، براحتك جدًا هكون ممتن لده، الموضوع دراسته معقدة ومش سهلة وتفاصيله كتيرة، فاحتمال خطئي موجودة، وهكون ممتن ومُقَدِّر وشاكر لتصحيحك!
يُتبَع...