هو إحنا عِرقنا "مصري قديم" (فرعوني زى ما دَرَج تسميته)؟ ... في الحقيقة ده تبسيط حُلمِي مُخَل للواقع، وخطأ "فرعنة الهوية المصرية" (لو جاز لي صك المصطلح) ميقلش خطأ وعبثية عن صبيانية الرئيس الراحل عبد الناصر ومساعيه الساذجة غير القارءة للواقع في محاولته تعريب الهوية والعرق المصري، ولا يقل خطأ عن التيار المتشدد الديني في مصر اللي بيحاول يمحو كل هوية وعرق والالتجاء للهوية الدينية فقط في سخرية من كل الهويات اللي عدِّت على سكان البقعة الجغرافية الديناميكية الحدود في مختلف الأزمنة المُسماة اصطلاحا بمصر...
فيه دراسات وأبحاث كتير اتعملت كانت بتحاول تحدد هوية وأصول العرق المصري، الأبحاث ديه كلها بدون استثناء أكدت إن نظرية الانحدار عن عرق واحد نظرية شعبية مش سليمة، احنا كوكتيل كوزموبوليتاني، موقع مصر الجغرافي (ومنه السياسي) أجبر الواقع يصير كوكتيلي المُحتَوَى، وأجبرنا نكون منحدرين من الميكس العجيب ده على مدار آلاف السنين، والميكس ده يشمل ولكن ميقتصرش على الأصول العرقية بحاوياتها الجغرافية التالية: سكان الشمال الافريقي، والجنوب الافريقي، والقرن الافريقي، العرق اليهودي، الآسيوي، الاوروبي، الاتراك (من خلال آسيا الصغرى)، الشوام، الفرس، العرب، حتى فترة التوسع الاستعماري الحديث أدخلت لنا أجناس من أعراق مختلفة بحاوييها الاتراك والايطاليين والفرنسيين والانجليز، ومن قبلها حركة توسع الامبراطوريات القديمة اللي ادخلت لنا أعراق بأجناس حاوييها الفرس والبابليين واليونانيين والرومان ... وغيرها!
على سبيل المثال في دراسة National Geographic Genographic Project وضحت بعد ١٠ سنين من تحليلات الـ DNA ان العرق المصري المعاصر يحمل جينات عربية بنسب تقريبية بمقدار ١٧٪ فقط (متحطش في بالك مًسمَى الدولة الرسمي!)، والنسبة الأكبر من جيناتنا مصدرها العرق الشمال أفريقي بنسبة ٦٨٪ بالاضافة لـ٤٪ عرق يهودي (تَخَيّل!) و ٣٪ شرق افريقي و ٣٪ اسيوي (من آسيا الصغرى) و ٣٪ اوروبي (جنوبها) ! ميكس متخطي للقارات عجيب صعب يتوفر في شعوب كتيرة! حتى العرق الشمال افريقي ده عرق مزيج من أعراق مختلفة تناوبت عليه تشمل ومتقتصرش على النوبيين (الافارقة) والعثمانيين (الاتراك) والشوام والروم (اليونانيين والايطاليين) والبابليين (العراقيين) والفرس (الايرانيين) على وجه الخصوص يعني ده سلة من مزيج الأعراق في ذاته! فالتوصيف الأدق اننا شرق اوسطيين بكل ما يحمله التوصيف ده من كوكتيل عجيب أو بمصطلح تاني "افرو-يورو-اسيويين"
أما عن الأسطورة القبلية المصرية المسيحانية عن وجود "عرق قبطي" صافي، فهو خلاف قديم ابتدا توثيقيًا في القرن الـ ١٨ على يد "قسطنطين فرانسوا فولني" اللي كان شايف كمان ان الأقباط كانوا negro (ذوي بشرى سوداء اللون)، وحجته في كده كانت التكوين الشكلي لراس أبو الهول! ده بعكس شامبليون (أيوة هو بتاع حجر رشيد) اللي أكد في كتابه عن مصر القديمة ان الاقباط هم نفسهم كانوا هجين ومزيج مكنوش عرق صافي وميمثلوش بدرجة نقية العرق المصري القديم (المصطلح عليه شعبيًا بالفراعنة رغم عدم دقة التسمية)، وجه بعدهم اللي رفض الرأيين واعتبر الجنس القبطي قوقازي، واستمر الخلاف يكبر ويؤكد هزلية الأسطورة الدارجة عند أغلب بسطاء المسيحيين المصريين اللي وعيهم الانثروبولوجي والسوسيولوجي خيل لهم إن ممكن شعب كامل ينفصل زمانيًا ومكانيًا عن معايشيه في صورة قوقعة تنقية عرقية (ولسه في محاولات فاشلة مستمرة لاقحام التقوقع ده في الواقع القبطي بس ده موضوع مُغاير) ...
ممكن تظن ان الميكس والكوكتيل ده ناتج فقط عن فترة ما بعد العصور الامبريالية، ولعبة كراسي السلطة الكلاسيكية والحديثة بعد حقبة مصر القديمة، بسبب التعايش والاختلاط والتزاوج، بس في الحقيقة ده مش سليم، في عملية تحليل علمية لمومياوات مصرية في سنة ٢٠١٢ لقوا ان العرق المصري القديم في DNA المومياوات كان ميكس من أعراق كتير، اهمها واغلبها الجنوب الافريقي، يليه القرن الافريقي ثم الشوام ثم العرب ثم الاوروبيين ثم العرق المتوسطي (نسبة لمنطقة حوض البحر المتوسط) ثم الشمال الافريقي وأخيراً بلاد الرافدين (اللي هى دلوقتي منطقة العراق وايران وسوريا والكويت) وتبع ده تحليل تاني سنة ٢٠١٧ لـ ١٥١ موميا اللي أدَّى بدوره لنسب توزيع أكتر للعرق المصري القديم كحقيبة أعراق مجمعة
الخلاصة، الافتخار أو الظن أن عرقنا فرعوني (مصري قديم)، أو عربي، أو قبطي، أو رومي، أو غيرها من صور الافتخار القبلي، هو في الحقيقة افتخار مُؤدلَج، كان له أجندته الخاصة في عصر من العصور لغرض من الأغراض اللي أغلبها مُسيَس ومُستَقطِب للطبقة الشعبية. محاولة تجاهل التنوع الكوزموبوليتاني والسوسيولوجي والانثروبولوجي اللي أنتج الكوكتيل العرقي المصري ده محاولة طفولية، حلم لا يقل سذاجة عن حلم وجود الجنس الآري النقي، وفي ظني لا يقل خطورة عنه لولا رحمة الآلهة أننا منملكش القوة النازية لاستعلاءه بمختلف توجهاته سابقة الذكر! ... لو مصمم وعندك احتياج سايكولوجي للافتخار، فافتخر بميكس أصولك وأعراقك ده، بس متبالغش أوي في حصره بمنهج انتقائي دوغمائي! افتخر كمصري حديث أنك "ميكرو-كوزموس" بتجمع في جيناتك أعراق متعددة، افتخر بانتماءك المتخطي للحدود العرقية والجغرافية ده لو عايز تفتخر، لإنه فعلًا عرق نادر الوجود مش بتفرده النقي ولكن باختلاطه التجميعي!
ــــــــــــــــــــ
* الصورة المُرفَقَة هى حفظ رقمي لنقش مصري قديم مُسمى بـ "جدول الشعوب/الأعراق"، تم العثور عليه في مقبرة رمسيس الثالث، وبيحوي رؤية المصري القديم للأعراق المختلفة في بيئته اللي كان عايش فيها، ومُختَلَف آركيولوجيًا وايجيبتولوجيًا (أيوة، ده اسم علم قائم بذاته!) على إن كانت أصلية أم مدسوسة في عصر متأخر على المقبرة